Kreu i partisë Demokratike Lulzim Basha, ka reaguar me një video pas çeljes së fushatës elektorale pasditen e djeshme.
Me anë të një postimi në rrjetet sociale, Basha shkruan se me ndihmën e shqiptarëve do të sjelli ndryshimin.
“ Së bashku për ndryshim. Shqipëria fiton! Ishte një mbrëmje e mrekullueshme! Me ndihmën tuaj ne do të sjellim ndryshimin për të gjithë shqiptarët dhe do të fitojmë. Së bashku për ndryshim”, shkruan Basha.
Pas hapjes zyrtare të fushatës, mëngjesin e sotëm reagoi edhe kryeministri Edi Rama. Me anë të disa fotove nga dy takimet në dy sheshet kryesor në kryeqytet, Rama i cilësoi “kartolina nga dy botë të ndryshme”.
Kujtojmë se Partia Demokratike zhvilloi dje një tubim elektoral, pavarësisht kushteve të pazakonta të pandemisë. Qindra simpatizantë të djathtë mbushën dje sheshin “Nënë Tereza”. Disa kishin ardhur me makina, ndërsa qindra të tjerë me flamuj e pankarta në duar.
Në fjalimin e tij hapës, kryedemokrati u shpreh se njësoj siç realizoi anëtarësimin në NATO dhe bëri të mundur heqjen e vizave, me të njëjtin vullnet do të arrijë edhe integrimin e vendit në BE.
Ndërkohë, ai u ndal edhe te programi i PD-së. Duke kërkuar mbështetjen e shqiptarëve që pas 26 prillit të ulet në karrigen e Kryeministrit dhe të vendosë në zbatim planet e PD-së, Basha tha se atëherë do të përmirësohet jeta e të rinjve, jeta e nënave, bizneseve etj.
