Tematika e presidentit të ri, tashmë është një “zonë e nxehtë” në politikë.
Ndërkohë që po aludohen emrat të cilët mund të jenë kandidaturat e mundshme për president, në këtë periudhë “konfuze” nuk ka ‘shpëtuar’ kreu i KQZ-së, Ilirjan Celibashi.
Duke folur në një konferencë për shtyp lidhur me dy proceset e fundit zgjedhore të 25 Prillit dhe 6 Marsit, ai u pyet edhe për procesin që do të nisë së shpejti nga Parlamenti.
Komisioneri Shtetëror i Zgjedhjeve, Ilirjan Celibashi u shpreh sot se nuk ishte ambicia e tij posti i Presidentit.
Celibashi theksoi se edhe pse gjithkush mund të ndihej i përkdhelur nga një propopzim i tillë, kjo gjë nuk ndodh me të, për shkak se kjo nuk është ambicia e tij.
“E dëgjoj për herë të parë, por e di që gjithkush mund të përkedhelej nga kjo gjë. Unë nuk ndihem fare i përkëdhelur dhe nuk është ambicia ime. Me thënë të drejtën nuk e konsideroj serioze këtë gjë në raport me propozimin. Për herë të parë po e dëgjoj”, u shpreh Celibashi.
Kujtojmë që Kuvendi do të nisë sot konsultimet paraprake për të zgjedhur Presidentin e ri të vendit. Grupi parlamentar i PS-së, ka thirrur në një tryezë tre grupet parlamentare të opozitës.
