Akoma nuk ka një faturë për implementimin e teknologjisë në zgjedhjet e vitit 2021. Sipas marrëveshjes së palëve politike në 5 qershor, një nga pikat kryesore, për të cilën u angazhua mazhoranca ishte implementimi i teknologjisë në zgjedhje për identifikimin biometrik të zgjedhësve.
Ilirjan Celibashi, Komisioneri Shtetëror i Zgjedhjeve deklaron se nuk ka asnjë vlerë se sa do të kushtojë kjo teknologji.
“Është qeveria ajo e cila ka shprehur gatishmërinë për ta mbështetur. Akoma nuk kemi një vlerësim, pasi ky vlerësim do të vijë pasi të kemi përcaktuar cilat parime, qoftë ato organizative, qofte teknike, do përcaktojnë implementimin e teknologjisë”, deklaron Celibashi.
Ilirjan Celibashit tregon se ka bërë një përçapje duke takuar ambasadorin e BE-së Luigi Soreca, që i ka ofruar ekspertizën e Bashkimit Evropian për teknologjisë në zgjedhje.
“Ne kemi pasur një takim me ambasadorin Soreca, i cili na garantoi mbështetjen e ekspertizës së BE për implementimin e teknologjisë”, deklaroi Ilirjan Celibashi.
Celibashi tha se ka edhe një skenar rezervë që diktohet nga pandemia, pra zhvillimin e zgjedhjeve online.
“Kjo ngelet për tu parë, është çështje delikate dhe kërkon vlerësim të të gjitha rasteve që do na imponojnë votim në këtë formë”, shprehet kreu i Komisionit Shtetëror të Zgjedhjeve.
Ilirian Celibashi drejtoi sot mbledhjen e Komisionit Rregullator, i cili miratoi rregullat e punës se si do të funksionojë gjatë administrimit të zgjedhjeve.
/GazetaReforma.com/
