Kreu i Komisionit Qendror të Zgjedhjeve (KQZ), Ilirjan Celibashi, ka njoftuar se më 11 janar 2025 fillon procesi i regjistrimit të votuesve që jetojnë jashtë vendit, në kuadër të zgjedhjeve parlamentare të 11 majit 2025.
Përmes një videomesazhi për Vitin e Ri, Celibashi theksoi se ky është një hap historik për demokracinë shqiptare, pasi për herë të parë bashkëqytetarët që jetojnë jashtë Shqipërisë do të kenë mundësi të votojnë nga vendet ku ndodhen.
Regjistrimi do të realizohet përmes Platformës Elektronike të Regjistrimit të Votuesve nga Jashtë, e cila është e aksesueshme nëpërmjet aplikacionit KQZ ose faqes zyrtare të internetit të institucionit.
“Ky është një moment i rëndësishëm për zgjedhjet në Shqipëri. Për herë të parë, bashkëqytetarët tanë jashtë territorit të Republikës së Shqipërisë do të mund të votojnë nga vendqëndrimi i tyre. Procesi i regjistrimit fillon më 11 janar 2025,” deklaroi Celibashi, duke uruar të gjithë shqiptarët për një Vit të Ri të mbarë.
