Republika Çeke po rezulton deri tani surpriza e këtij Kampionati Europian. Çekët arritën të kualifikohen në 8 më të mirat e Europës pasi turpëruan Holandën me rezultatin 2-0. Holanda, një nga skuadrat pretendente në nisje të turneut, e mbylli ndeshjen me 10 lojtarë pasi De Ligt u ndëshkua me karton të kuq.
Çeika jo vetëm që arriti të mbrohej mjaft mirë duke mos pësuar asnjë gol, por kontrolli lojën duke shënuar dy të tillë, me një Holandë që ishte shumë larg nga paraqitjet e saj të zakonshme. Edhe pse dolën të parët në grupin e tyre, të besuarit e De Boer u gjunjëzuan përballë Çekisë që i mbylli grupet në vendin e tretë.
Heronjtë e golave për Çekinë ishin Tomas Holes dhe Patrick Schick, të dy gjetën rrugën e rrjetës në pjesën e dytë.
Ndeshja u mbajt përballë një audience prej plot 56 mijë tifozësh në Puskas Arena të Hungarisë që ka lejuar stadiumet me kapacitet të plotë.
Tashmë Republika Çeke do të përballet në Baku me Danimarkën, e cila ka qenë gjithashtu një skuadër që ka fituar respekt maksimal në këtë turne. Danezët u kualifikuan të dytët e grupit, ndërsa në fazën e 1/16-ave shkatërruan Uellsin 0-4. Në mbrëmje pritet të mësohet çerekfinalisti tjetër mes Belgjikës dhe Portugalisë.
