Me identifikimin e rasteve të para me koronavirus në Shqipëri, qeveria vendosi mbylljen e shkollave për dy javë deri më 23 mars, e me shtimin e rasteve afati u shty deri më 3 prill.
Por, duke marrë shkas nga zhvillimet në vend Ministria e Shëndetësisë ka vendosur më 1 prill mbylljen e të gjithë institucioneve publike dhe private deri në një kohë të pacaktuar.
Në këto kushte, teksa qeveria po ndërmerr lehtësime të shumta, nxënës e studentë të shumtë janë të shqetësuar se çfarë do ndodhë me shkollat, teksa deri tani është përdorur si zgjidhje mësimi online.
Ministrja e Arsimit, Besa Shahini, me anë të një reagimi në Facebook, ka bërë me dije se në fund të prillit do të merret një vendim lidhur me vitin shkollor, teksa u shpreh se qeveria ka gati dy skenarë, por e gjitha varet nga vendimi që do të marrë Task- Forca.
Edhe një herë ministrja përsëriti se në Maturën Shtetërore nuk do të ketë pyetje nga mësimet e marra gjatë periudhës së koronavirusit, ndërsa lidhur me studentët Shahini tha se gjithçka do të vendosej nga vetë Univeritetet.
“Ju falenderoj që keni qëndruar në shtëpi. Nuk ka ende një vendim final për mbylljen e vitit shkollor. Do ta kemi në fund të prillit pra punë ditësh. Thjesht po shohim situatën e koronavirusit dhe po presim një vendim nga Task Forca. Sidoqoftë i kemi të gjithë skenarët gati, për të dyja rastet. Maturantët na pyesin se kur do t’i pyblikojmë programet orientuese për ta. Gjithashtu në fund të prillit. Nuk do përmbajnë temat që nuk janë zhvilluar në kushte shkolle. Studentët pyesin gjithashtu për mënyrën sesi do të mbyllet viti akademik. Ata kanë një fleksibilitet të shtuar duke qënë se provimet i kanë në korrik por po punojmë shumë ngushtë me dekanët dhe rektorët. Në fund të ditës vendimin e marrin Universitetet. Disa maturantë na kanë shkruar edhe se kur do të mbyllet viti dhe nëse do të kenë mundësi për të aplikaur jashtë vendit. Plani ynë është që gjithçka të përfundojë në kohë dhe të mos ketë pengesa për aplikimin jashtë vendit, shumë shpejt merret vendimi. I kemi gati skenarët dhe mësuesit. Maturantët kanë një pako të veçantë dhe përfshihet edhe një udhëzues sesi të punohet me ta. Pjesa e punës tek ta do të jetë e përqëndruar tek përsëritja. Na shkruani nëse kemi pyetje,”-tha Shahini.
https://www.facebook.com/1980444878879282/posts/2556099187980512/
Kjo deklaratë e ministres pason atë të kryeministrit, i cili tha dje se vendimi rreth procesit mësimor do merret javën e ardhshme.
