Prej mëse një jave numri i rasteve të reja me koronavirus ka pësuar rënie të ndjeshme dhe arsyeja për këtë është e thjeshtë dhe e dukshme: ulje e numrit të testimeve. Dita e sotme shënoi numrin më të ulët të testimeve pas një kohe të gjatë, ndërkohë që numri i viktimave ishte dy herë më i lartë se dje.
Jo më larg se mbrëmjen e kaluar zv/ministrja e Shëndetësisë, Mira Rakacolli tha në një intervitsë në ABC News se masat në vijim dhe numri i pjesëmarrësve në aktivitete do të vareshin nga situata e pandemisë në vend.
“Përderisa është vendimi i Gjykatës Kushtetuese patjetër që është detyrim zbatues. Ne do të shprehemi gjithmonë për afatin në lidhjen me numrin e personave që mund të grumbullohen sipas situatës epidemiologjike në vend” ka thënë Rakacolli.
“Në rast se situata epidemiologjike është kjo që është sot, indikatorët tregojnë që nuk duhet në asnjë mënyrë që të zgjerohet numri i personave që marrin pjesë në një aktivitet së bashku, të çfarëdo lloji qoftë ky aktivitet. Kjo nuk ka të bëjë me tematikën e aktivitetit, por ka të bëjë me ruajtjen e shëndetit”, vazhdoi ajo.
Dhe siç duket Ministria e Shëndetësisë e ka të qartë se shifrat e COVID-19 në vend duhet të vijnë duke u ulur, në këtë mënyrë nuk cenohen as tubimet elektorale e as nuk bie popullariteti i qeverisë para zgjedhjeve. Jo më kot Komiteti Teknik shtyu në maksimum mbledhjen që kishte lajmëruar javë më parë, deri sa doli në vendimin për të mos ndryshuar masat, ndërsa më vonë vendosi edhe për lejimin e tubimeve elektorale. Në këtë vazhdimësi është edhe Ministria e Shëndetësisë që prej një jave ka ulur vazhdimisht numrin e testimeve. Shifrat e testimeve për javën e fundit vijojnë si më poshtë:
3001 testime (15 mars)
3005 testime(16 mars)
2997 testime(17 mars)
2994 testime(18 mars)
2986 testime(19 mars)
3251 testime(20 mars)
3487 testime(21 mars)
1993 testime(22 mars)
Me uljen e testimeve ka ardhur natyrshëm edhe ulja e rasteve të reja të infeksioneve. Në dy ditët e fundit testimet janë rritur dhe rastet po ashtu, për të ardhur në ditën e sotme me një numër tepër të ulët testimesh, po ashtu edhe rastesh. Rastet e reja gjatë kësaj jave vijojnë si më poshtë:
543 raste të reja (15 mars)
475 raste të reja(16 mars)
446 raste të reja(17 mars)
590 raste të reja(18 mars)
494 raste të reja (19 mars)
519 raste të reja(20 mars)
659 raste të reja(21 mars)
344 raste të reja(22 mars)
Strategjia e përdorur nga Ministria e Shëndetësisë e tregon qartë se gjëja e fundit që iu intereson është jeta e qytetarëve. Ndërkohë që OBSH dhe ekspertët në vend e kudo në botë rekomandojnë testime për të kontrolluar pandeminë, qeveria shqiptare bën çdo gjë të mundur për të fshehur situatën e për t’u dukur sikur ka çdo gjë në kontroll para zgjedhjeve.
