Presidenti i Partisë së Lirisë, Ilir Meta, ka ankimuar vendimin e Gjykatës së Posaçme për masën e sigurisë “arrest me burg” dhe seanca për shqyrtimin e ankimimit do të zhvillohet në Apelin e GJKKO-së më 19 dhjetor, në orën 10:00.
Rreth tre javë më parë, GJKKO rikonfirmoi masën “arrest me burg” për Ilir Metën, ndërsa masën “detyrim paraqitje” për Monika Kryemadhin, bashkëshorten e tij, si dhe për Ema Çokun.
Ndërkaq, për Pirro Xhixhon, gjykata ka ndryshuar masën nga “arrest shtëpie” në “detyrim paraqitje”.
Ilir Meta u arrestua në kuadër të hetimeve për akuzat e korrupsionit, pastrimit të parave dhe fshehjes së pasurisë.
Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtari Erjon Çela, bazuar në nenet 112, 237 dhe 248 të K.Pr.Penale, me vendimin Nr. 130, datë 23.10.2024, vendosi: 1. Vazhdimin e zbatimit të masës së sigurimit personal “arrest në burg” e parashikuar nga neni 238 i K.Pr.Penale ndaj personit nën hetim Ilir Metaj, e caktuar me vendimin nr. 125, dt. 20.10.2024 të Gjykatës së Posaçme të Shkallës së Parë për Korrupsionin dhe Krimin e Organizuar si i dyshuar për kryerjen e veprave penale “Korrupsioni pasiv i funksionarëve të lartë shtetërorë ose të zgjedhurve vendorë” në 3 (tre) raste nga të cilat në dy raste në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim dhe më shumë se një herë, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i çdo personi që ka detyrimin ligjor për deklarim” të parashikuara nga nenet 260 e 25, 287/2 dhe 257/a/2 të K.Penal”, thuhej në vendimin e dhënë nga GJKKO, lidhur me caktimin e masës së sigurisë.
