Komisioni i Ligjeve i ka shkurtuar fondet Këshillit të Lartë të Prokurorisë në mes të debateve për miratimin e projektbuxhetit të vitit 2021 për institucionet e pavarura. Kryetari i Këshillit të Lartë të Prokurorisë, Gent Ibrahimi, kërkoi ndër të tjera, edhe katër shoferë për anëtarët e Këshillit. Ibrahimi tha se të gjithë anëtarët e Këshillit të Lartë Gjyqësor kishin shoferë personalë sipas ligjit, ndërsa anëtarët e KLP kishin katër shoferë mangët.
“Po përjetojmë situata jo të zakonshme në lidhje me buxhetin për shkak të gjendjes së pandemisë, ndaj për të pasur barazi, është më mirë t’u heqim atyre 5 shoferë, që t’u lëmë 7 atyre dhe 7 ju. Dhe kështu jemi të gjithë në rregull. Se nuk e kuptoj dot se kur të gjithë e kemi rripin e shtrënguar nga tërmeti dhe pandemia, çfarë problemi ka që anëtarët e KLP dhe KLGJ të lëvizin në këmbë siç po lëvizin edhe ne deputetët|”, reagoi Kryetari i Komisionit Ulsi Manja.
Ibrahimi kërko barazi mes dy Këshillave. Relatori Bashkim Fino tha se është absurde të kërkosh katër shoferë në këtë kohë pandemie.
Debati:
Gent Ibrahimi: Meqenëse KLP, ndryshe nga KLGJ, është konstituuar nga e para në 2019, në atë rast mbi ne aplikohej një tavan, sa i takon raportit midis punonjësve mbështetësh dhe punonjësve teknikë. Ky tavan na lejonte ne që të merrnim maksimalisht një numër prej 7 shoferësh, gjë që do të thotë se vetëm 7 nga 11 anëtarë të KLP e gëzojnë këtë shërbim, në një kohë kur të gjithë anëtarët e Këshillit të Lartë Gjyqësor e kanë këtë shërbim.
Bashkim Fino: KLP ka një buxhet të kënaqshëm, jo të përshtatshëm, por shumë të kënaqshëm… Duke pasur vakante dhe thua se dua edhe katër shoferë të tjerë, në një kohë pandemie dhe krize globale, mua më duket absurde.
Gent Ibrahimi: Është e vërtetë ajo që tha z. Fino që KLP ka 65 punonjës dhe janë të punësuar vetëm 57. Por nuk bën sens që ta përziesh këtë me kërkesën që unë bëra për shtimin e numrit të stafit mbështetës…
Bashkim Fino: Unë nuk mendoj se prishet balanca e KLP-së se ju doni të shtoni katër shoferë. Ndërkohë që shumë institucione, ministritë, deputetët dhe institucione më të larta nga ju, nuk kanë shofer fare. Dhe shumë mirë që nuk kanë. Nuk ulet puna e KLP për katër shoferë.
Gent Ibrahimi: Unë i kuptoj argumentet e z. Fino. Bashkë kemi qenë ku kemi miratuar strukturën e KLP. Por, nuk mund të them se sot se një anëtar i KLGJ ka një status më të lartë se sa një anëtar i KLGJ. Këtu nuk mund të ketë organe më të larta dhe më të ulëta. Vetëm Kuvendi është organ më i lartë nëse mund të të përdoret ky term.
Ulsi Manja: Jam me ju në pikën e barazisë që ju kërkoni trajtim të barabartë në status me KLGJ. Këtë barazi në status e ka edhe ligji. Po përjetojmë situata jo të zakonshme në lidhje me buxhetin për shkak të gjendjes së pandemisë, ndaj për të pasur barazi, është më mirë t’u heqim atyre 5 shoferë, që t’u lëmë 7 atyre dhe 7 ju. Dhe kështu jemi të gjithë në rregull. Se nuk e kuptoj dot se kur të gjithë e kemi rripin e shtrënguar nga tërmeti dhe pandemia, çfarë problemi ka që anëtarët e KLP dhe KLGJ të lëvizin në këmbë siç po lëvizin edhe ne deputetët.
/TPZ.al/
