Ministrja e Shtetit dhe Kryenegociatorja për Procesin e Negociatave, Majlinda Dhuka, ka paraqitur në Komisionin për Çështjet Europiane Buxhetin e vitit 2025, duke e cilësuar atë si një dokument të rëndësishëm në një moment kyç për Shqipërinë, pas hapjes së grupeve të parë të negociatave me Bashkimin Europian.
Dhuka theksoi se ky buxhet është një hap i rëndësishëm për realizimin e investimeve dhe implementimin e rekomandimeve të Komisionit Europian.
Ajo sqaroi se buxheti i vitit 2025 është i fokusuar në përpjekjet për thellimin e reformave të rëndësishme, si reforma në drejtësi, digjitalizimi, reformimi i shërbimeve publike dhe forcimi i institucioneve të shtetit.
Ministrja gjithashtu theksoi mbështetjen për përparimin dhe reformat në punësim dhe mirëqeverisje, për forcimin e lidhjeve me rrjetet europiane, përfshirë infrastrukturën rrugore, hekurudhore, ajrore dhe detare.
Po ashtu, buxheti i 2025 parashikon mbështetje për afrimin e tregut të energjisë të Shqipërisë me atë europian, duke synuar që vendi të bëhet eksportues i energjisë elektrike për Bashkimin Europian brenda kësaj dekade.
