Në Komisionin e Ligjeve, gjatë seancës së mbajtur këtë të mërkurë, u shqyrtua buxheti për vitin 2025.
Pjesëmarrëse ishte edhe Sekretarja e Përgjithshme e Presidencës, Valbona Lusha, e cila dha detaje mbi përdorimin e fondeve për Presidencën.
Lusha shpjegoi se pjesa më e madhe e këtij fondi do të përdoret për rikonstruksionin e godinës ekzistuese të Presidencës.
Për më tepër, ajo kërkoi një shtesë prej 36 milionë lekësh në buxhet, të cilat, sipas saj, do të shpenzohen për blerjen e automjeteve të reja për përdorimin e Presidentit të Republikës dhe stafit të tij administrativ dhe teknik.
Mjetet nuk plotësojnë kushtet e nevojshme, nisur nga viti i prodhimit, kilometrat, amortizimin dhe garancinë në funksionin që kryejnë. Është e nevojshme blerja e automjeteve për një perfomacë sa më të lartë.
Lidhur me buxhetin 2025-2027, investim në orendi dhe pajisje zyre është i nevojshëm për godinën që do të rikonstruktohet. Investimi për pajisje kompjuterike dhe elektronike, përbën një domosdoshmëri në plotësimin e nevojave të institucionit. Rëndësi të veçantë në buxhet ka përfundimi i objektit të godinës ekzistuese të institucionit të Presidencës,- u shpreh Lusha.
