Studiuesi dhe aktivisti i njohur për mbrojtjen e trashëgimisë kulturore, Auron Tare, ka ngritur alarmin mbi gjendjen e rënduar të Parkut Kombëtar të Butrintit, një ndër zonat më të rëndësishme natyrore dhe kulturore në Shqipëri, me vlera të njohura në nivel ndërkombëtar.
Në një reagim të publikuar në faqen e tij zyrtare në Facebook, Tare ka shpërndarë pamje shqetësuese që dokumentojnë degradimin e një pjese të zonës së mbrojtur, duke akuzuar institucionet përgjegjëse për braktisje dhe neglizhencë të thellë.
Sipas tij, kjo zonë e Butrintit, e cila në vitet ’90 ishte e destinuar për ndërtime nga Qeveria “Berisha 1”, u shpëtua falë përpjekjeve të vazhdueshme të Fondacionit Butrinti dhe ndërhyrjes së Ministres së Kulturës së asaj kohe, Arta Dade, si dhe mbështetjes nga figura të larta shtetërore si Edi Rama, Fatos Nano dhe Presidenti Rexhep Mejdani. Kjo nismë u konsiderua një nga veprat më të mëdha të Partisë Socialiste pas vitit 1997, duke i dhënë mbrojtje ligjore dhe institucionale një pasurie të çmuar kombëtare.
Por sot, sipas Auron Tares, gjithçka duket se është lënë në mëshirë të fatit. “Falë punës së përkushtësuese të Ministres Kumbaro & Co, pamjet flasin vetë,” shprehet ai me ironi dhe indinjatë.
Kjo deklaratë ngre dyshime të forta mbi mënyrën sesi po menaxhohet aktualisht parku dhe akuzon drejtpërdrejt Ministrinë e Kulturës për dështim në ruajtjen e një trashëgimie me rëndësi të jashtëzakonshme për vendin.
Pamjet e publikuara nga Tare shërbejnë si një provë vizuale e shqetësimeve të ngritura prej kohësh: trashëgimia e Butrintit nuk është vetëm në rrezik, por ndodhet në prag të një rrënimi të pakthyeshëm.
Ai u bën thirrje autoriteteve që të marrin përgjegjësinë që u takon dhe të ndërhyjnë menjëherë për të ndalur këtë proces degradues, përpara se të jetë tepër vonë për një nga thesaret më të çmuara të historisë dhe natyrës shqiptare.
