Gazetari Andi Bushati, i ftuar në emisionin “Çim Peka Live” në Syri TV, deklaroi se Shqipëria nuk funksionon më si një shtet demokratik, por si një regjim ku pushteti politik, krimi i organizuar dhe media e kapur veprojnë së bashku për të shantazhuar edhe investitorët e huaj.
Duke komentuar një raport ndërkombëtar që paralajmëron për kapjen e shtetit, Bushati u ndal te fakti se përfshirja e mediave në këtë mekanizëm shantazhi është tregues i një situate alarmante. Sipas tij, kjo është dëshmi se çdo mekanizëm mbrojtës për qytetarët është shuar: as drejtësia, as pushteti dhe as media nuk ofrojnë zgjidhje.
“Vetë fakti që përfshin edhe ne, mediat, është i tmerrshëm. Në një shoqëri demokratike, kur të kërcënon ose një kriminel ose një punonjës shteti, shkon te drejtësia ose denoncon në media. Por kur as mediat dhe as gjykatat nuk të japin zgjidhje, atëherë unë them: edhe sikur të mos kishim opozitë dhe qeveri, por t’i fusnim këto të dhëna në një inteligjencë artificiale dhe ta pyesnim nëse ky është vend demokratik apo regjim autokratik, përgjigjja do të ishte e qartë”, u shpreh Bushati.
Ai theksoi se nëse edhe një biznesmen i fuqishëm, me burime financiare, nuk gjen të drejtën, atëherë një qytetar i thjeshtë është edhe më i pambrojtur. Për Bushatin, raporti duhet të shërbejë si një dëshmi tronditëse për realitetin shqiptar dhe si një konfirmim i hidhur se “demokracia ka vdekur”.
“Sa më shumë vazhdojmë të debatojmë për këtë, aq më shumë fakte mblidhen në këtë drejtim. Ky nuk është më një debat politik, por një realitet i dhimbshëm për çdo qytetar shqiptar”, përfundoi ai.
