Një ngjarje e rëndë dhune është regjistruar ditën e sotme në Kosovë. Dy persona, një djalë i ri dhe një grua në qendër të qytetit të Pejës kanë dhunuar barbarisht një tjetër grua. Pamjet që janë publikuar në rrjetet sociale janë vërtet të rënda ndërsa qytetarët në rrugë, nuk kanë ndaluar për t’i dhënë ndihmë. Dhuna e ushtruar ndaj gruas së vetme është tepër e rëndë, sidomos nga ana e djalit.
Kanë qenë dy qytetarë që kanë ndërhyrë dhe e kanë shoqëruar të dhunuarën në spital, ndërsa nga njoftimi zyrtar thuhet se dy personat që u futën në mes të sherrit janë dy policë të veshur civilë.
Mësohet se dhunuesit janë dërguar në komisariatin e Policisë. Po ashtu Policia e Kosovës në rajonin e Pejës ka lajmëruar se dy persona janë arrestuar. Gjithashtu nuk është bërë identiteti i të tre personave që u përfshinë në konflikt dhe se çfarë lidhje kanë pasur me njëri-tjetrin, po ashtu nuk dihet arsyeja që ka çuar në përdorimin e dhunës
“Rreth orës 14:00 në rrugën Nëna Tereza në Pejë, Policia ka hasur në një rrahje e cila ishte në progres, Ka arrestuar dy persona, viktima është dërguar në spital. Rasti nga Prokurori është cilësuar si lëndim i lehtë. Dy persona janë dërguar në mbajtje”, tha zëdhënësi i Policisë në Pejë, Fadil Gashi.
