Mbrëmjen e djeshme, Shërbimi i Kontrollit të Brendshëm të Burgjeve ka arrestuar drejtorin e komanduar në burgun e Reçit, Ervis Zikën.
Akuzat që bien mbi Zikën lidhen me faktin se ai ka shpërdoruar detyrën, duke futur sende të ndaluara në ambientet e vuajtjes së dënimit. Gjithashtu ai akuzohet edhe për vjedhje të karburantit,përmes firmosjes së kartelave fiktive. Për abuzim me karburantin po hetohen edhe ish-zyrtarë të tjerë.
Theksojmë se urdhri për arrestimin është dhënë nga prokuroria e Rrethit Gjyqësor Shkodër.
Vlen të përmendim se arrestimi i Zikës, vjen pas disa ngjarjeve ndodhura më parë në këtë burg, që në kohën kur drejtohej nga Maliq Meta, i cili është shkarkuar nga posti i drejtorit të Burgut të Reçit në Shkodër, më 12 janar të këtij viti.
Bashkë me të edhe Robert Bundo Shefi i policisë në këtë institucion dhe polici Gëzim Qoshku. Pezullimi i tyre nga puna erdhi pas akuzave se falsifikuan raportin për një konflikt fizik brenda burgut.
Sipas njoftimit të bërë atëherë nga Shërbimi i Kontrollit të Brendshëm të Sistemit të Burgjeve urdhrin për ekzekutimin e vendimit për pezullim e dha Prokuroria e Rrethit Gjyqësor Shkodër, pasi nga hetimi vërtetoi se zyrtarët falsifikuan raportet për të lehtësuar të dënuarit autorë të një sherri. Hetimi ka nisur para disa muaj nga SHKB dhe është arritur në konkluzionin se dokumenti ka qenë i falsifikuar.
