Gjashtë drejtues të Burgut të Fushë-Krujës rezultojnë të infektuar me koronavirus. Pasi rezultuan pozitiv nga testi i Covid-19 ata janë izoluar menjëherë nga pjesa tjetër e stafit. Por gjatë kësaj kohe, ata kanë pasur kontakt edhe me persona të tjerë në institucion.
Të infektuar me Covid gjenden edhe në radhët e të dënuarve që janë dërguar në burgun e Shënkollit në Lezhë. Burgu është kthyer tashmë në spital për Covid-in, i vënë në dispozicion të të prekurve nga koronavirusi.
E pyetur në interpelancë parlamentare për këtë çështje, Ministrja e Drejtësisë, Etilda Gjonaj tha se “na u desh të aplikonim protokollet shëndetësore brenda sistemit të burgjeve, me qëllim shkëputjen e zinxhirit të virusit COVID 19”. Ajo pranoi se kishte 3 të burgosur që ishin aktiv të cilët ishin kthyer nga leja e posaçme, një (1) i IEVP Fushë Krujë dhe 2 të IEVP Fier.
Që nga fillimi i situatës së pandemisë janë kryer 273 testime për të burgosur nga ku 74 të burgosur pozitiv dhe 199 të burgosur negativ. Nga 74 të burgosur që rezultuan pozitiv, 1 i burgosur (Caush Banaj) ka humbur jetën, 70 janë negativizuar.
Situata COVID 19 përsa i përket stafit të IEVP: Janë kryer 390 testime për stafin punonjës nga ku 80 kanë rezultuar pozitiv dhe 310 kanë rezultuar Negativ. Nga 80 rastet e konfirmuara pozitiv 72 janë negativizuar, 1 punonjës ka humbur jetën dhe 7 rezultojnë ende pozitiv.
/GazetaReforma.com/
