Qeveritë e vendeve europiane janë gati të hapin rrugën për sanksione kundër Rusisë të hënën për burgosjen e liderit të opozitës Alexey Navalny. Masat ndëshkuese nuk ka gjasa të synojnë manjatët rusë, siç kanë kërkuar Navalny dhe aleatët e tij, sepse disa nga vendet anëtare të bllokut janë të kujdesshëm për të mos djegur të gjitha urat me Moskën. Në vend të kësaj, masat ka të ngjarë të godasin zyrtarët rusë dhe entitetet që dyshohet se janë të përfshirë drejtpërdrejt në çështje.
Një dritë jeshile në parim nga ministrat e jashtëm për masat do të jetë hapi i parë i një procesi ligjor që duhet të shohë sanksione të miratuara zyrtarisht deri në Mars. Sanksionet kanë nevojë për mbështetje unanime nga 27 anëtarët e bllokut për t’u miratuar.
Diskutimi i javës tjetër do të vijë pasi diplomati i lartë i BE Josep Borrell u sulmua për një udhëtim në Moskë në fillim të këtij muaji, kur Ministri i Jashtëm rus Sergei Lavrov përdori një paraqitje të përbashkët për të përçmuar Bashkimin Europian , duke e kritikuar si një partner jo të besueshëm. Borrell vizitoi Moskën kundër dëshirave të disa vendeve anëtare të BE, ndërsa disa diplomatë në Bruksel thanë se ishin të pakënaqur me performancën e tij në konferencën për shtyp. Pas vizitës, Lavrov kërcënoi të ndërpresë lidhjet nëse BE vendos sanksione të mëdha.
Sanksionimi i Oligarkëve
Aleatët e Navalny i kanë bërë thirrje bllokut të sanksionojë zyrtarë të lartë, bankierë shtetërorë dhe miliarderët Roman Abramovich dhe Alisher Usmanov. Një zëdhënës i Abramovich ka thënë se nuk ka bazë për pretendimet e bëra kundër tij nga Navalny dhe aleatët e tij. Usmanov nuk u është përgjigjur akuzave.
Navalny, 44 vjeç, u arrestua në mes të janarit pas kthimit të tij nga Gjermania, ku ai u trajtua për një helmim me agjent nervor që ai dhe kombet perëndimore ia fajësuan Shërbimit Federal të Sigurisë së Presidentit Putin, i njohur si FSB. Kremlini mohoi çdo rol në sulm.
Një gjykatë në Moskë më 2 shkurt dënoi Navalny me 2 vjet e 8 muaj për shkeljen e kushteve të provës të një dënimi të mëparshëm. Burgosja e tij shkaktoi protestat më të mëdha anti-Putin në vite dhe një goditje të dhunshme me 11,000 arrestime dhe ndjekjen penale të ndihmësve të Navalny. Rusia ka refuzuar vazhdimisht thirrjet e BE dhe SHBA për ta liruar atë.
Bloomberg.com
