Kryetari i Bashkisë Tiranë, Erion Veliaj, me zell të madh njofton se në nëntor të këtij viti, do të hapet përfundimisht edhe Bulevardi Zogu I, që po rikonstruktohet.
Madje, ai e quan një arritje kaq të madhe, të cilën po e mbyll për 6 muaj, teksa fliste sot në mëngjes në emisionin ‘Ëake Up’.
Por, Veliaj mesa duket harron, me dashje ose jo, që punimet në këtë bulevard kanë nisur që në datën 5 gusht të vitit 2019. Po bëhet gati 1 vit e gjysmë që aty janë duke u kryer punime, dhe ende nuk ka përfunduar puna për një rrugë madje më pak se 1 kilometër e gjatë.
“Ishin dy investime që duheshin bërë. Më kujtohet kur njerëzit thoshin kur do ndërrohen pllakat te “Zogu I”, kurse tani thonë pse po bëhen tani, duhet të bëhen më vonë. Nuk duhet të bëhemi të gjithë gjithologë. Një punë që tipikisht kërkon 2 vjet kohë, po e bëjmë në 6 muaj. Përpara fundit të tetorit ose fillimit të nëntorit, Bulevardi “Zogu I” do të hapet” – shprehet Veliaj, duke harruar se bulevardi ka që në gusht të vitit të kaluar i mbyllur.
Për të mos harruar faktin që e gjithë kurora me pemë në rrugën e mesit të biçikletave është zhdukur, madje edhe shumë pemë anash nëpër trotuare. Zvarritja kaq shumë e punimeve për rreth 700 metra rrugë, ka sjellë gjithashtu edhe një trafik të rënduar në rrugët që lidhen me këtë bulevard shumë të frekuentuar nga qytetarët e Tiranës.
/GazetaReforma.com/
