Ish-presidenti Bujar Nishani ka konfirmuar mbështetjen e tij për ish-kryeministrin Sali Berisha në turin që ky i fundit do të nisë në mbarë vendin, për të bashkëbiseduar me demokratët.
Në një postim në rrjetin social Facebook, Nishani shkruan se do të bashkohet me demokratët e vërtetë ditën e sotmenë orën 18:00, për një PD të bashkuar e fituese dhe jo më peng të regjimit të korruptuar majtist.
“Unë do të bashkohem me demokratët e ndershëm e të vërtetë Sot në Rogner, në 18:00 !
Për një PD të Bashkuar, të Fortë e Fituese !
Jo më PD, Peng i rregjimit të korruptuar majtist!”- shkruan ish-presidenti Bujar Nishani.
Vetë ish-kryeministri Sali Berisha njoftoi dje nisjen e turit të tij që do të fillojë me Tiranën e për të vazhduar në gjithë vendin. Berisha doli hapur kundër kryedemokratit Lulzim Basha, pas vendimit të këtij të fundit për ta përjashtuar nga grupi parlamentar i PD, për shkak të shpalljes së tij “non-grata” nga SHBA.
Ish-kryeministri deklaroi se Basha nuk do ta dërgojë kurrë PD-në në fitore dhe tha se bashkërendoi forcat me kryeministrin Edi Rama kundër tij. Berisha ka thënë vazhdimisht se vendimi nuk ishte në tagrin e Bashës dhe se nuk parashikohet në statutin e partisë.
