Një grup prej 11 emigrantësh shqiptarë, përfshirë një grua shtatzënë dhe një djalë 17-vjeçar, janë gjetur në bordin e një anije mallrash në Southampton.
Grupi u zbulua nga punëtorët në Portin 4 të mërkurën në mëngjes, tha në një deklaratë Forca Kufitare e Britanisë. Një zëdhënëse e Ministrisë së Brendshme tha se kuptohet që ata kishin mbërritur në qytet me një anije nga Le Havre, Francë.
Policia e Hampshire tha se gruaja shtatzënë ishte dërguar në spital dhe 10 personat e tjerë qëndrojnë në paraburgim. Sipas policisë, djali 17-vjeçar do të transferohej në kujdesin e shërbimeve të fëmijëve.
Operatori i portit tha se po mbështeste “agjencitë qeveritare me hetimet e tyre dhe po punon me kompaninë e transportit për të gjetur pronarët “.
‘Ndihma e palës së tretë’
Anija, një transportues automjetesh që mund të mbajë deri në 6,000 makina, është në pronësi të firmës së transportit detar Wallenius Wilhelmsen. Në një deklaratë firma tha: “Pasi kishin arritur të hynin në mënyrë të paligjshme në terminalin Le Havre, emigrantët duket se kishin asistencë të palës së tretë që i ka fshehur në kabinën e ngarkimit të një kamioni që transportohej në një nga kuvertat e ngarkesës.
“Wallenius Wilhelmsen” është duke ndërmarrë një hetim të plotë në bashkëpunim me autoritetin portual në Le Havre se si emigrantët kanë hyrë në port dhe anije dhe si postblloqet nuk arritën t’i ndalonin.”
/GazetaReforma.com/
