Marrëveshja e Theresa May me Bashkimin Evropian për Brexit, është rrëzuar nga parlamenti britanik me 432 vota kundër.
Ndërkohë, May arriti të merrte vetëm 202 vota deputetësh pro marrëveshjes. Edhe pse pritej që parlamenti britanik ta refuzonte këtë marrëveshje, sërish kjo shënon humbjen më të madhe të një qeveri në Britaninë e Madhe.
Madje, laburistët, nisur nga ky rezultat pritet të kërkojnë edhe një votë mosbesim për qeverinë May, që mund të çojë Britaninë edhe në zgjedhje të parakohshme.
Si hap imediat qeveria do të duhet të paraqesë në Parlament “Planin B” brenda tre ditësh. E nëse serish nuk binden deputetët disa nga opsionet janë; E para, dalja nga BE pa marrëveshje dhe ligji e mundëson daljen më 29 mars. Opsioni i dytë, mbetet rinegociimi me Brukselin, që do kërkoj kohë dhe shtyrje të hyrjes në fuqi të Nenit 50 për ta vonuar procesin e Brexit.
Një opsion i tretë, është mbajtja e zgjedhjeve të reja të përgjithshme si rrugëdalje nga impasi dhe sigurimin e një mandati të ri për marrëveshjen e kryeministres britanike.
