Protesta e organizuar ditën e sotme nga opozita ka nxitur edhe reagimin e zëvendës kryeministrit Erion Braçe, i cili ka qenë relativisht i fortë.
Në reagimin e tij, Braçe i drejtohet drejtpërdrejt ish-kryeministrit, Sali Berishës dhe kreut të Partisë Demokratike, Lulzim Bashës.
Zëvendës kryeministri ka thënë se gjithë dhuna i duhet vetëm Berishës dhe Bashës për t’i treguar ndërkombëtarëve destabilitetin në vend. Ai ka thënë se ata nuk do të marrin kurrë atë që duan, pra një viktimë dhe policia po duron dhe zbaton deri në fund ligjin.
Deklarata e plotë e Erion Braçes:
“Shikoni, Sali Berisha, Lulzim Basha e ideologët e dhunës, po ndërtojnë një dialog të dhunshëm me ndërkombëtarët.
Protesta e sotme do ishte asgjë pa dhunën!
Ndaj dhuna u urdhërua kur ndodhi asgjëja!
Dhuna i duhet Sali Berishës e Lulzim Bashës për t’i treguar ndërkombëtarëve destabilitetin!
Asgjë më shumë!
Kriminale është që të dy, Sali Berisha e Lulzim Basha, as që i llogarisin shqiptarët, ditën, jetën dhe ekonominë e tyre, kur urdhërojnë #DHUNËN.
Sulmi i dhunshëm mbi policinë, është kriminal dhe synon drejtpërdrejtë jetën e tyre!
Prej shtatorit 2013-të, POLICIA E SHTETIT ka vendosur një standard të qëndrueshëm në raport me qytetarët në protestë;
NUK VRET MË KUSH!
Pa më të voglin diskutim, kjo e acaron pa fund Berishën e Bashën, dy vrasësit barbarë të 21 janarit.
Që nga 16 shkurti, policia ka qenë përballë tyre pa armë, nuk ka sulmuar e nuk ka goditur qoftë edhe një të vetëm, është sulmuar me shishe me benzinë, kapsolla shpërthyese, gurë e pllaka guri, çdo send të fortë të mundshëm;
Policia thjeshtë ka zbatuar ligjin, ka duruar dhe në fund ka arrestuar dhunuesit!
Me drejtë e ligjërisht sa kaq, nuk ka.
Ndaj dy gjera dua të them;
E para, respekt ndaj çdo burri me uniformë në #PolicinëeShtetit dhe #GardeneRepublikës për nderin, dinjitetin dhe profesionalizmin në ushtrimin e detyrës, qëndresën dhe vendosmërinë në mbrojtjen e institucioneve kushtetuese të vendit, mbi të gjitha për mbrojtjen e rendit e sigurisë së qytetarëve!
E dyta, boll me goditje mbi policinë e shtetit, boll, mos provokoni kot, nuk do e merrni kurrë atë që doni, një viktimë për të barazuar dy vrasësit që keni në krye!
Nuk do ndodhë kurrë”, shkruan Braçe.
