Dy figurat që i janë bashkuar Partisë Socialiste për këto zgjedhje, Luljeta Bozo dhe Najada Çomo kanë mbajtur fjalimin e tyre në hapjen e fushatës ditën e sotme te sheshi “Skënderbej”.
Çomo ka thënë se ajo do të përfaqësojë bluzat e bardha dhe se është bashkuar me PS-në sepse nuk kanë llafe por punë. Ajo ka kërkuar votën për ministren e Shëndetësisë, Ogerta Manastirliun, pasi sipas saj ka bërë një punë të palodhur.
“Unë do të përfaqësoj të gjitha bluzat e bardha. Ju afrova skuadrës socialiste të PS dhe skuadrës, por unë nuk jam politikane, jam profesioniste dhe do ta vazhdoj luftën time në betejën me covidin. Jam bashkuar me skuadrën e PS-së me bindje sepse kam parë njerëz të palodhur që nuk kanë llafe, por vetëm punë. Unë nuk kërkoj që ta marr votën për vetën, por kërkoj që të votohet Ogerta si një grua dhe si një ministre ka bërë një punë të palodhur dhe të paepur”, ka thënë Çomo.
Nga ana tjetër Luljeta Bozo ka thënë se falë PS në këto 8 vite është rritur niveli i jetesës dhe se këto 8 vite ka pasur ndryshime të mëdha. Bozo ka bërë thirrje që të gjithë të votojnë PS-në, për të rilindur Shqipërinë e shkatërruar nga një forcë natyrore.
“Populli do të dijë ta bëjë zgjedhjen e duhur dhe do të dijë që të votojë PS-në. Në këto 8 vite ka arritje të dukshme, është rritur niveli i jetës, shërbimit dhe në gjithë fushat e tjera. Nga çfarë është arritur të krijohet bindja që kjo forcë politike me këtë vizion, ne do të arrijmë reforma dhe ndryshime edhe më të mëdha nga këto 8 vite. Gjithë programi i PS-së është i bazuar në llogari shumë të sakta dhe në energjinë e të rinjve dhe popullit. I ftoj të gjithë njerëzit, sepse jam e bindur në zgjuarsinë e tyre, për të votuar këtë forcë politike që i ka vënë detyrë vetes të eliminojë pandeminë dhe dëmet nga tërmeti, duke e rilindur Shqipërinë që u shkatërrua nga një forcë natyrore”, tha Bozo.
