Në një intervistë me AFP, Borrell tha se bisedimet me talebanët janë të nevojshme nëse duan që bëjnë tërheqjen përfundimtare të trupave amerikane nga Afganistani, deri më 31 gusht. Në total janë planifikuar të evakuohen 30 mijë civilë amerikanë dhe afganë.
Shefi i politikës së jashtme të Bashkimit Evropian Josep Borrell shprehet se është e pamundur të evakuohen nga aeroporti i Kabulit deri më 31 gusht të gjithë afganët që kanë punuar me forcat e huaja dhe jo vetëm.
“Problemi është qasja në aeroport. Masat e kontrollit dhe sigurisë amerikane janë shumë të rrepta. Ne protestuam. Ne u kërkuam atyre të tregojnë më shumë fleksibilitet. Me sa di, amerikanët nuk kanë njoftuar se do të qëndrojnë përtej kësaj date. Por ata mund të ndryshojnë mendje. Këta janë partnerë aktivë. Por numri i afganëve që kanë punuar për ne gjatë njëzet viteve të fundit është shumë më i madh. Kabuli ka dy aeroporte. Aeroporti civil është në duart e talebanëve dhe asnjë fluturim nuk niset. Amerikanët kontrollojnë ushtarakun. Ata në pistë hipin në aeroplanë. Në aeroplanin që mbërriti në Madrid sot, një e treta e udhëtarëve ishin amerikanë. Nëse amerikanët largohen, evropianët nuk do të kenë aftësinë ushtarake për të siguruar aeroportin ushtarak dhe talebanët do të marrin kontrollin. Nëse doni të nxirrni jashtë stafin tuaj, duhet të flisni me talebanët. Por do të jetë e pamundur të nxirren të gjithë afganët që kanë nevojë për mbrojtje nga Kabuli. Është e pamundur. E paimagjinueshme. Le të mos tregojmë përralla,”- tha Borrell.
