Teksa gjithë bota është paralizuar nga COVID-19, disa shtete vendosën ta menaxhojnë ndryshe situatën, siç është Suedia që në fillimin të pandemisë tërhoqi vëmendjen e të gjithve, pasi nuk mori pothuajse asnjë masë.
Ky vend tregoi një qasje të ndryshme ndaj koronavirusit, nga të gjithë faktorët e tjerë ndërkombëtarë, duke i besuar publikut në marrjen e masave vullnetare, pra vetëndërgjegjësimi publik.
Qeveria e Suedisë insistoi te puna në shtëpi kur është e mundur, duke shmangur lëvizjet dhe të moshuarit u këshilluan të shmangin kontaktet sociale.
Restorantet, baret, kafenetë dhe klubet e natës iu tha të ofrojnë vetëm shërbim të tryezave të ulura, teksa tubimet e më shumë se 50 njerëzve janë të ndaluara.
Si e tillë, në krahasim me kudo tjetër në Europë, jeta në Suedi dukej jashtëzakonisht normale.
Çfarë di Suedia që po vepron ndryshe nga e gjithë bota në këtë situatë pandemie?
Mirëpo, ajo çka paraqitet në kopertinë është krejt ndryshe nga brendësia!
Siguria e tepërt në mosmarrjen e masave, të këshilluara nga Organizata Botërore e Shëndetësisë, ka bërë që Suedia të përballet me pasojat e para.
Ndonëse numri i viktimave është i ulët, 887, krahasuar me numrin e të infektuarve, 10,151, vihet re se numri i të vdekurve në Suedi është shumë më i lartë sesa në vendet fqinje si Danimarka (247) dhe Norvegjia (113), që vendosën kufizimet në muajin mars.
Vetë kryeministri suedez Stefan Lovfen ka pranuar se nuk është bërë mjaftueshëm në marrjen e masave ndaj COVID-19, duke shfaqur pendesën e tij për këtë gjë.
“Duket qartë për ne që nuk kemi bërë sa duhet,” tha kryeministri Stefan Lofven për kanalin TV SVt, pas rritjes së rasteve.
Kjo situatë nuk i ka shërbyer as ekonomisë së Suedisë, pasi Swedbank parashikoi që ekonomia do të tkurrej me 4% në vitin 2020.
“Rënia në ekonominë suedeze është më e gjerë dhe më e shpejtë sesa gjatë krizës financiare. Papunësia do të arrijë në 10% tashmë deri në verë, përkundër stimulimit të paprecedent fiskal”, tha Swedbank.
Qeveria ka njoftuar një paketë ndihme për ndërmarrjet e vogla dhe të mesme, duke thënë se do të garantojë 70% të kredive të reja që bankat u japin kompanive që po përjetojnë vështirësi financiare për shkak të virusit dhe po ashtu, qeveria uli përkohësisht kontributet e sigurimeve shoqërore dhe prezantoi mbështetjen e qirasë ndaj ndërmarrjeve.
