Rruga nacionale në Bunec, që lidh këtë zonë me Himarën, është bllokuar plotësisht për shkak të çarjes së digës së HEC-it.
Ky problem ka penguar qarkullimin e mjeteve, duke i lënë ato të bllokuara dhe pa mundësi lëvizjeje.
Përveç kësaj, janë raportuar dëme në disa biznese të afërta. Shumë automjete janë detyruar të kthehen pas për shkak të vonesave të shkaktuara.
Njoftimi i Policisë:
“Sot, rreth orës 12:38, në Bunec, Lukovë, dyshohet se është çarë diga e hidrocentralit, duke krijuar rrezik për përmbytje. Në vendngjarje ndodhen shërbimet e Policisë dhe emergjencave civile, të cilat po punojnë për të siguruar evakuimin e çdo personi që mund të jetë në rrezik. Deri tani janë shkaktuar vetëm dëme materiale, ndërsa situata po monitorohet nga afër për të shmangur pasoja të tjera. Policia fton qytetarët që të shmangin lëvizjet në zonën e rrezikuar dhe të raportojnë menjëherë për çdo rast emergjence.”
