16 deputetët mes tyre edhe kreu i PD Sali Berisha që kërkuan futjen si çështje e parë e rendit të ditës ‘McGonigal’, kanë bllokuar foltoren, pas refuzimit të kërkesës së tyre. Kryeministri Rama, i cili cilësohet si më i implikuari në këtë skandal nuk ishte në sallë.
Nikolla: S’ka nevojë që të vini të gjithë zoti Noka. Keni vetëm 3 minuta, shikoni rregulloren.
Ndonëse mori vërejtje nga drejtuesja e seancës Berisha vijoi të fliste për çështjen McGonigal.
“Nuk mund të ketë sot debat tjetër përveç këtij debati. Shqiptarët duhet të marrin vesh të vërtetën. Edi Rama të vijë këtu të japë dorëheqjen dhe të shkojë të dëshmojë në SHBA.
Çfarë doni më shumë se kaq? A e dini kush ishte McGonigal, funksioni i tij, që i çuat ju paratë e kompanive të oligarkut rus. E dini ju se Deripaska i ka tentakulat e tij në të gjithë sektorët e ekonomisë shqiptare.
A e dini ju se Damiani juaj është zëdhënës kryesor i interesave ruse në Shqipëri”, tha Berisha.
Pas bllokimit për 30 minuta të foltores dhe tërheqjes disa herë të vëmendjes, Nikolla i njoftoi përjashtimin nga seanca.
Nikolla: Jeni për masën e tretë që është përjashtim nga seanca
Berisha: Ne do e mbajmë fjalën deri nesër në drekë. Mbylle, ikni po të doni, Ne do u flasim shqiptarëve.
Nikolla: Jeni i përjashtuar, lironi foltoren! Berisha ju lutem lironi sallën.
Deputetët e PD-së kanë reaguar duke i rënë tavolinave dhe kanë mbajtur fjalime në foltore.
