Ditën e sotme kompania e mirëmbajtjes së Rrugës së Arbrit “Albania Highway Concession” (AHC) u kërkoi drejtuesve të shoferëve që do të kalojnë nga kjo rrugë që të kenë kujdes për shkak të rënies së vazhdueshme të borës në këtë zonë që prej ditës së djeshme.
“Kërkojme nga përdoruesit e rrugës të ecin me shpejtësi të reduktuar. Të respektojnë sinjalistiken rrugore dhe kujdes të shtuar në tabelat elektronike dhe mesazhet e përcjella në to! Të lëvizin me goma dimërore dhe prezencë zinxhirësh në makinë“, shkruhet në njoftimin e AHC.
Një seksion i Rrugës së Arbrit u përurua dje nga kryeministri Rama, por moti i keq me dëborë bllokoi 100 automjete, ndërsa më pas lëvizja e makinave u lehtësua pas pastrimit të borës.
Dje Autoriteti Rrugor Shqiptar u bëri thirrje shoferëve që në Qafën e Murrizës dhe Rrugën e Arbrit të kalojnë me zinxhirë në goma ose goma dimërore.
Në shumë zona malore të vendit ka patur vështirësi në lëvizjen e makinave dhe ndërprerje të energjisë elektrike.
Kujtojmë se rreth 100 automjete mbetën të bllokuara në Rrugën e Arbrit, në pjesën e Qafës së Murrizit. Reshjet e borës të rëna gjatë ditëve kanë bërë që trashësia të shkojë në rreth 15 cm, në pikën më të lartë në afërsi të antenave ku lartësia nga niveli i detit shkon në 1260 metra.
Reshjet e borës kanë zënë të pa përgatitur drejtuesit e mjeteve që vinin nga Tirana, të cilët nuk ishin pajisur me goma dimërore dhe zinxhirë.
