Këtë fundjavë, dhjetra agjentë të Byrosë Kombëtare të Hetimit dhe prokurorë të Prokurorisë së Posaçme janë angazhuar në një operacion në qytetin e Elbasanit.
Prania e tyre u vu re nga qytetarët, dhe ky numër i madh i agjentëve në qytet nuk ishte parë më parë, sidomos që nga nisja e fushatës elektorale për zgjedhjet parlamentare të 11 majit.
Ky intensifikim i monitorimit të fushatës zgjedhore në Qarkun e Elbasanit po mbështetet nga një koordinim të gjerë mes BKH, SPAK, OSBE-së, Shërbimit Informativ Shtetëror, dhe Agjencisë së Inteligjencës Financiare.
Të gjitha këto struktura janë në gatishmëri të plotë për të parandaluar çdo cënim të procesit zgjedhor, përfshirë ndikimin e krimit të organizuar, përdorimin e burimeve publike për qëllime elektorale dhe tentativat për blerje votash.
Përmes pajisjeve teknologjike të avancuara, hetuesit janë duke monitoruar çdo aktivitet elektoral, ndërsa vëzhgimi i detajuar është bërë më i rëndësishëm se kurrë.
Burime zyrtare theksojnë se angazhimi i organeve ligjzbatuese ka si qëllim të sigurojë integritetin e procesit zgjedhor të 11 majit, me Qarkun e Elbasanit që konsiderohet ndër më të “blinduarit” për këtë proces.
Grupi i monitorimit, i udhëhequr nga prokurori Olsi Dado, është në terren dhe po ndjek në kohë reale çdo zhvillim që lidhet me zgjedhjet. Kandidatët për deputetë, po ashtu, janë nën rrezikun e ndjekjes ligjore nëse përfshihen në shkelje të ligjit gjatë procesit zgjedhor.
Ata që kapen në shkelje mund të humbasin mandatin dhe të përballen me pasoja ligjore.
Edhe media është nën vëzhgim për pasqyrimin e ngjarjeve gjatë kësaj periudhe. Disa portale janë vënë në shënjestër për publikimin e lajmeve të pavërteta, si ai i dhunës fizike të një personi në Librazhd, një ngjarje që më pas u zbulua si sajesë për të njollosur procesin zgjedhor.
