Ditën e sotme Gjykata e Krimeve të Rënda pranoi gjykimin e shkurtuar për 3 gjyqtarët e Durrësit, të cilët akuzohen për korrupsion që nga nëntori i vitit 2018.
Në nëntor të 2018-ës nën akuzën “korrupsioni pasiv i gjyqtarëve, prokurorëve apo punonjësve të drejtësisë”, prokuroria dërgoi për gjykim gjyqtarët Kliton Spahiu, Petraq Dhimitri dhe Petrit Çeno. Këtë herë pjesë e këtij procesi do të jetë edhe biznesmeni Namik Sadiku cili akuzohet nga Prokuroria e Krimeve të Rënda për “korrupsioni aktiv”.
Nga disa të dhëna nga BIRN në nëntor të vitit 2014, tre gjyqatrët dyshohet se kanë shkuar në një udhëtim në Spanjë për të parëndeshjen e futbollit midis Real Madrid dhe Barcelonës, i njohur si derbi “El Classico”.
Tre gjyqtarët kanë qenë nën shoqërinë e biznesmenit Namik Sadiku, pronari i një kompleksi turistik në Durrës dhe se udhëtimi është paguar prej tij.
Biznesmeni Namik Sadiku ishte përfshirë në një çështje gjyqësore në Gjykatën e Apelit Durrës ku relator ishte gjyqtari Spahiu dhe anëtarë të trupit gjykues ishin Petrit Çeno dhe Petraq Dhimitri. Konflikti gjyqësor lidhet me ndërtimin e hotelit 10 katësh të Sadikut në plazhin e Durrësit, në zonën e Shkëmbit të Kavajës.
Në vitin 2012, Sadiku ishte paditur nga ish-ortaku i tij për ndërtimin e kompleksit Oliver Ushina. Ky i fundit kishte dalë fitues në Gjykatën e Rrethit Gjyqësor Durrës.
Por, Gjykata e Apelit e ka rrëzuar vendimin e Shkallës së Parë duke i dhënë të drejtë Sadikut.
