Nga një hulumtim i kryer nga Sekretariati i Këshillit të Investimeve rezulton se bizneset janë të braktisur nga ana e qeverisë dhe nga shoqatat e biznesve. Sipas rezultateve të anketimit rezulton se 7 nga 10 kompani të anketuara nuk mbështeten sa duhet financiarisht dhe kanë mungesa informacioni
Gjithashtu në një hulumtim që lidhet me konkurrueshëmrinë dhe aksesin në tregje të produkteve shqiptare me standarde europiane thuhet se “operatorët ekonomikë theksojnë një mungesë të konsiderueshme të mbështetjes, jo vetëm nga agjencitë qeveritare, por edhe nga shoqatat e biznesit dhe dhomat e tregtisë.
Një tjetër pikë që kanë ngritur bizneset si shqetësim kundrejt qeverisë dhe shoqatave është se dhomat e tregtisë dhe shoqatat e biznesit nuk ofrojnë informacion të përditësuar mbi legjislacionin e produkteve. Sekretariati vlerëson se sipas perceptimit të biznesit, 7 nga 10 pranuan mungesën e informacionit të përditësuar nga shoqatat e biznesit/ dhomat e tregtisë për detyrimet që lidhen me legjislacionin dhe infrastrukturën e cilësisë, standardet dhe 2 nga 10 kompani nuk janë në dijeni nëse një informacion i tillë disponohet.
Panorama mbetet e ngjashme edhe për institucionet publike ku tre nga pesë kompani deklarojnë se qeveria nuk ofron masa për të lehtësuar aksesin në certifikim dhe dy në pesë kompani theksojnë mungesën e asistencës financiare të shtetit për uljen e kostove për përftimin e standardeve.
“Nga konsultimi ynë me biznese individuale dhe dhomat e tregtisë, përfshirë të dhënat nga anketa, evidentohet se një pjesë e konsiderueshme e bizneseve nuk janë në dijeni të ndonjë mbështetjeje nga qeveria, duke evidentuar ose mungesën e interesit ose mungesën e besimit tek institucionet publike përgjegjëse” thuhet në anketë.
I njëjti publikim vlerëson se mbështetja financiare për pajisjet dhe teknologjinë, thjeshtimi i procedurave për marrjen e certifikatave dhe programet e edukimit dhe trajnimit mbi standardet janë identifikuar si masat kryesore mbështetëse në të cilat qeveria duhet të investojë për të inkurajuar kompanitë të prodhojnë dhe tregtojnë në përputhje me standardet.
Sekretariati theksoi në tërësi se ka një mungesë të të dhënave statistikore që në fakt janë baza kur vjen puna tek ndërmarrja e politikave.
“Identifikohet një mungesë të dhënash statistikore institucionale (për produktet jo-ushqimore) për operatorët ekonomikë lokal që shoqërohet me mungesë të identifikimit të sektorëve prioritarë me potencial konkurrues brenda vendit dhe për eksport”
