Pasojat e pandemisë sapo kanë filluar të ndjehen, teksa pezullimi i aktivitetit për dy muaj për shumë biznese duket të ketë qenë fatal.
Qendra Kombëtare e Biznesit raporton se ka marrë një boom aplikimesh për ngrirje të aktivitetit, për të shmangur detyrimet dhe raportohet se janë më shumë se 3000 biznese që kanë aplikuar për pezullim aktiviteti gjatë këtij viti, kryesisht në periudhën e shpërthimit të pandemisë.
Sipas të dhënave zyrtare të QKB duket se deri më tani janë miratuar rreth 2000 kërkesa për pezullim, ndërsa pjesa tjetër mbetet ende në pritje.
Nga ana tjetër, të shumtë kanë qenë dhe ato biznese që kanë kërkuar mbyllje të aktivitetit, duke kapur shifrën e 1,000 aplikimeve për çregjistrim, pasi kanë qenë personat fizik, ose të vetëpunësuarit që kryesojnë në listën e atyre që kanë kërkuar ndërprerje të përkohshme të biznesit.
Ndër të tjera, QKB sqaron se për të aplikuar për pezullim të aktivitetit, kushti i paravendosur është mospasja e detyrimeve të pashlyera, pasi në të kundërt aplikimi nuk do të ishte funksional.
Vlen të theksohet se probleme të shumta po hasen në dhënien e ndihmës financiare prej 40 mijë lekësh, që e përfitojnë rreth 176 mijë të punësuar, dhe të larguar nga puna.
Deri më tani e kanë marrë ndihmën financiare sipas Ministrisë së Financave vetëm rreth 55% përfituesve dhe referuar të dhënave të Ministrisë e kanë marrë pagën prej 94 mijë e 822 punonjës pagën, ndërsa janë miratuar por janë në proces lëvrimi të pagës mbi 3 mijë punonjës.
Procesi për dhënien e ndihmës prej 40 mijë lekësh ka filluar prej më shumë se një muaj, dhe që janë hasur disa probleme duke bërë që numri i përfituesve të jetë më i vogël se pritshmërisë.
1- Shumë biznese u është refuzuar aplikimi pasi kanë pasur kodin ekonomik ndryshe të regjistruar në QKB, dhe ndryshe tek Tatimet.
2- Ka pasur probleme me datën e largimit te punonjësve nga puna, pasi sipas punëdhënësve ka shumë punonjës që janë larguar pas datës 10 prill.
3- Ka pasur tatimpagues që nuk kanë pas bërë deklaratën e tatimit mbi fitimin dhe i del automatikisht i refuzuar në system.
4- Mund të ketë pasur pasaktësi në aplikimin e kryer.
5- Refuzohen edhe ato persona që janë në më shumë se një listë-pagesë. Pra të dy ose tre-punësuarit përfitojnë vetëm një pagë.
6- Kërkesa mund të refuzohet edhe për pasaktësi në llogarinë bankare por që mund të riaplikojë përsëri.
7- Mund të ketë pasur edhe mos-aplikime për ndihmën nga ana e bizneseve.
