Ndryshon totalisht ligji për procedurat tatimore dhe këtë e ka lajmëruar vet drejtori i politikave fiskale në Ministrinë e financave Niko Lera. Në një intervistë për Nevvs24, Lera ka thënë se janë rreth 40 mijë biznese të cilat aktualisht nuk janë duke funksionuar me llogari bankare dhe kanë xhiro mbi 2 milionë lekë, gjë e cila do ndryshojë. Pra të gjithë bizneset që kanë xhiro mujore mbi 2 milionë lekë në vit, janë të detyruar të pajisen me llogari bankare, përjashtim bëjnë vetëm bizneset që e kanë xhiron nga 0 në 2 milion. Kjo sipas Lerës do të sjellë uljen e qarkullimit të parave të pista.
“Synohet që të ulet cash në ekonomi sepse duke ulur cashin redukton dhe mundësinë për qarkullimin e parave të pista dhe krijohet më shumë mundësi për kontrollin e fluksit të parave nga hyjnë ku shkojnë. Sipas të dhënave të BB rezulton që 40 % e tatimpaguesve të biznesit të vogël nuk kanë llogari.”-u shpreh Lera.
Përveç bizneseve detyrim për të hapur një llogari do të kenë edhe Organizata Jo fitimprurëse.
“Nëse kanë status person juridik dhe kanë marrëdhënie me administratën tatimore deklarimi patjetër që dhe OJF-të do të kenë detyrim. Ne duhet të kemi të qartë që nëpërmjet OJF shpesh kanalizohen fonde,para të cilat lëvizin dhe që duhet të ketë transparencë në transfertat e tyre sepse ka risqe dhe mund të përdoren për operacione të ndaluara.” -theksoi Lera
Por a do të ketë kjo një kosto shtesë për bizneset të cilat do të paguajnë edhe komision në banka?
“Do të ketë kosto nëse do të kryhet transaksione por unë ju risqaroj që pjesa dërrmuese e këtij grupi operojnë nëpërmjet llogarive likuiduese.”
Për ato biznese që nuk e zbatojnë ligjin drafti i cili është hedhur për konsultim publik parashikon edhe panalitet që arrijnë nga 50 deri në 100 mijë lekë. E gjithë paketa parashikohet të gjej zbatim pranverën e këtij viti. Ministria e Financave thotë se ndryshimet ligjore janë kërkuar nga Këshilli i Evropës, më konkretisht Agjencia evropiane kundër Pastrimit të Parave “Moneyval”.
