Pas skandalit të fundit në Onkologjik, ku u zbulua se mjekët sugjeronin pacientët për trajtime në klinika private, qytetarët janë mbledhur në një protestë përpara Ministrisë së Shëndetësisë. Gazetari Osman Stafa i pranishëm në protestë, gjatë fjalës së tij theksoi rëndësinë e hetimit të thellë dhe të drejtësisë për qytetarët.
“Ky është një skandal i madh. Thonë mjekët pa pikë turpi ‘hajde se ja japim gjysmë mjekimi atij qytetarit’. Është shumë turp. Prokuroria ka nisur hetim dhe është lajm i mirë. Por akuzat janë të lehta. Ti ke vrarë njerëz e si mund të hetohesh ti për shpërdorim detyre. SPAK duhet të hetojë çdo repart në QSUT, sepse çdo repart ka grupe të tilla që çojnë qytetarët tek klinikat e tyre për t’i zhvatur,” tha Stafa.
Gazetari theksoi se shumë qytetarë janë të detyruar të shesin pasuritë e tyre, të hyjnë në borxhe dhe të sakrifikojnë gjithçka për trajtim mjekësor, duke ngritur shqetësimin për mungesën e ilaçeve dhe mjekimeve adekuate në spitalet publike.
“Fatkeqësisht në Shqipëri, nga të sëmurët ngelin ata që shesin shtëpinë, tokën, lopën, hyjnë në kredi, për t’u shëruar se nuk kanë mundësi ekonomike. Melanoma është sëmundje dhe Ministria e Shëndetësisë thotë se ka mjekim vetëm për melanomën pozitive e jo atë negative. Ky diferencim është skandal,” shtoi ai.
Stafa theksoi se protesta nuk është vetëm kundër mjekëve të veçantë, por kundër një sistemi që lejon abuzime të tilla. Ai bëri thirrje për veprim dhe solidaritet, duke nënvizuar se sot janë qytetarët në nevojë, por nesër mund të jetë dikush tjetër.
“Duhet që të sigurohen ilaçet nga spitalet. Në spitale mungojnë shumë medikamente e duhet të reagojmë të gjithë. Nëse ti nuk reagon sot, nesër mund të kesh ti nevojë e nuk do të ketë kush të ngrejë zërin më për ty,” përfundoi Stafa.
Qytetarët kërkojnë drejtësi dhe transparencë nga institucionet përkatëse dhe që të merren masa konkrete për të parandaluar raste të tilla në të ardhmen.
