Pak ditë më parë Tirana u trondit nga një atentat mafioz, ku mbeti i pajetë Hekuran Billa.
Për vrasjen e këtij të fundit policia ka shoqëruar në polici 22-vjeçarin Sebastiano Mali dhe dy të rinj nga Shkodra.
Këtyre të fundit, policia u ka sekuestruar armë pas kontrollit që u është kryer në banesa.
Dje u arrestua Sebastian Mali, nipi i Prel Markut, ndërsa sot policia ka shpallur në kërkim për atentatin Viktor Markun, vëllain e Prel Markut, të mbetur të vrarë nga Billa disa vite me parë.
I riu Sebastian Mali nuk ka pranuar të ketë lidhje me ekzekutimin e Billës.
22-vjeçari ka rrëfyer në polici se prej disa muajsh ai jetonte në zonën e ish-Bllokut në Tiranë dhe kishte marrë me qira një BMW X6.
Makinat e përdorura nga Viktor Marku e Sebastjano Mali kanë qenë të marra me qira në Shkodër nga familjarë të Sebastjanos.
Kujtojmë këtu se Billa u qëllua në zonën e “Komunës së Parisit” teksa ishte duke udhëtuar me makinën e tij.
Pista kryesore që po hetohet është ajo e të shkuarës së Billës, i cili rezulton si anëtar i një bande shqiptare, që përveçse me trafikun e femrave dhe drogës, kishte gjetur një tjetër mënyrë për të bërë para.
Banda ku bënte pjesë Billa dhe një tjetër me anëtarë nga Kosova, vidhin paratë nga vendet e parkimit duke i shkaktuar bashkisë 1,243,000 £ dëm.
Pikërisht për këtë biznes të ri dhe të pa ‘lëvruar’ më parë, Billa vrau një të pafajshëm.
Mësohet se Mali ka rrëfyer në polici:
“Nuk kam lidhje me atentatin. Nuk kam gjurmuar viktimën. Isha në zonë për qejf, pasi shikoja një vajzë që vinte shpesh aty”.
