Për shkak të interesit të lartë për ndeshjen Shqipëri – Serbi, e vlefshme për kualifikueset e Kampionatit Botëror 2026, Federata Shqiptare e Futbollit njofton se do të zbatojë një procedurë të veçantë për shpërndarjen e biletave, me qëllim menaxhimin sa më të mirë të kërkesës së shumtë nga tifozët.
Duke marrë parasysh që kërkesat pritet të jenë shumë më të mëdha se kapaciteti i stadiumit, nuk do të ketë shitje të drejtpërdrejtë të biletave.
Në vend të kësaj, do të aplikohet një proces aplikimi nëpërmjet një formulari elektronik, i cili do të publikohet më 15 maj 2025 në kanalet zyrtare të FSHF-së.
Elementet kryesore të këtij procesi janë:
• Çdo aplikues do të ketë të drejtë të kërkojë deri në 4 bileta.
• Pas përfundimit të afatit të aplikimeve, do të zhvillohet një përzgjedhje e rastësishme përmes shortit elektronik.
• Aplikuesit që do të përzgjidhen do të njoftohen me email disa ditë para ndeshjes.
• Personat e përzgjedhur do të marrin një link unik për të kryer pagesën online gjatë periudhës 30 maj – 2 qershor 2025.
• Pas pagesës, biletat elektronike do t’u dërgohen përmes emailit të regjistruar.
Kujdes: Bileta mund të transferohet vetëm një herë. Çdo transferim i mëtejshëm do ta bëjë atë të pavlefshme.
