Instituti Kombëtar i Shëndetësisë Publike në Kosovë raporton se ditën e sotme, janë regjistruar edhe shtatë raste të reja të të infektuarve me koronavirus. Kjo shifër, bazohet në 1.224 mostra të testuara. Gjatë 24 orëve të fundit, nuk është shënuar asnjë rast i vdekjes. Nga sëmundja COVID-19, janë shëruar edhe 12 pacientë, ndërsa raste aktive janë plot 166.
Me shifrat e fundit, numri i përgjithshëm i rasteve pozitive në Kosovë arrin rreth 108 mijë, ndërsa i viktimave në 2 mijë e 256. Sa i takon numrit të shëruarve, shkon në 105 mijë e 292 persona.
Deri të premten, sipas Ministrisë së Shëndetësisë në Kosovë, janë dhënë 152 mijë e 643 doza të vaksinës kundër koronavirusit, ndërsa 26 mijë e 794 qytetarë, tashmë janë vaksinuar me dozën e dytë.
Vaksinimi po bëhet me doza të dhuruara nga programi i Covax, i Organizatës Botërore të Shëndetësisë, si dhe nga Bashkimi Evropian dhe shtete individuale. Procesi i vaksinimit në Kosovë, ka nisur në fund të muajit mars dhe po vazhdon me ritme të kënaqshme.
Ditën e djeshme, nga 1.764 testime të bëra në të gjithë territorin e vendit kanë rezultuar pozitivë me virusin 14 persona. Fatkeqësisht, nuk kanë arritur ta fitojnë betejën me COVID-19 dy persona, ndërsa lajmi i mirë ishte se e kanë fituar betejën me koronavirusin 6 qytetarë.
