Ministria e Shëndetësisë në Kosovë, ka publikuar bilancin e Covid për ditën e sotme. Ministria ka bërë me dije se në 24 orët e fundit, janë shënuar 19 raste të reja me Covid-19 dhe për fat të mirë, asnjë viktimë.
Këto raste janë konfirmuar pas testimit të 2 mijë e 267 mostrave, ndërkohë kryeministri i vendit, Albin Kurti, u ka bërë thirrje vazhdomisht qytetarëve që të vaksinohen sa më shumë që të jetë e mundur.
Njoftimi i IKSHPK:
Ministria e Shëndetësisë ka bërë të ditur se në 24 orët e fundit janë konfirmuar 19 raste me coronavirus, nga 2,267 testime të bëra, ndërkaq, në total numri i rasteve aktive është 126.
MSH njofton se në 24 orët e fundit nuk është shënuar asnjë rast i vdekjes, ndërsa janë shëruar 7 persona. Në 24 orët e fundit janë dhënë 19.609 doza të vaksinës kundër COVID-19. Prej fillimit të vaksinimit në të gjitha qytetet e Kosovës janë dhënë 343.330 doza të vaksinës. Deri më sot 102.210 qytetarë janë vaksinuar me dozën e dytë.
Ndërsa ditën e djeshme, Instituti i Shëndetit Publik në Kosovë raportoi se kanë rezultuar pozitiv me virusin e rrezikshëm 28 qytetarë. Lajm i mirë është se edhe gjatë ditës së djeshme, nuk është raportuar asnjë humbje jete. Gjithashtu ditën e sotme, e kanë fituar betejën me virusin 18 qytetarë, ndërsa numri i përgjithshëm i të shëruarve është 105.575.
