Presidenti i SHBA-ve Joe Biden dhe Angela Merkel u takuan ditën e enjte në Uashington në atë që me shumë mundësi do të jetë vizita e fundit e kancelares gjermane në Shtëpinë e Bardhë. Mes “mosmarrëveshjeve” të vogla, ata ranë dakord që të qëndrojnë së bashku kundër agresionit nga Moska dhe veprimeve anti-demokratike të Pekinit.
Biden e vlerësoi Merkel duke e quajtur novator shërbimin e saj ndaj Gjermanisë dhe botës.
Lidhjet transatlantike vuajtën nën mandatin e ish-Presidentit Donald Trump dhe të dy Merkel dhe Biden ishin të etur për të treguar se marrëdhënia ishte në rregull gjatë kohës së tyre së bashku.
“Unë e vlerësoj miqësinë”, tha Merkel në Zyrën Ovale, duke përmendur rolin e Amerikës në ndërtimin e një Gjermanie të lirë dhe demokratike pas Luftës së Dytë Botërore. Merkel është udhëheqësja e parë europiane që viziton Biden në Shtëpinë e Bardhë që nga inaugurimi i tij në janar.
Pavarësisht përzemërsisë, disa mosmarrëveshje ishin të dukshme. Biden përsëriti shqetësimet e tij në lidhje me tubacionin Nord Stream 2 që po ndërtohet nën Detin Baltik nga Rusia në Gjermani; Shtetet e Bashkuara kanë frikë se Moska do ta përdorë atë si një mjet kundër Ukrainës. Projekti prej 11 miliardë dollarësh, i cili pritet të përfundojë në shtator, do të anashkalojë Ukrainën, duke e privuar atë potencialisht nga tarifat e tranzitit.
Presidenti përsëriti se ai vendosi kundër sanksionimit të kompanisë pas tubacionit sepse projekti ishte afër përfundimit, një vendim që tërhoqi kritika nga demokratët dhe republikanët. Por Biden tha se ai dhe Merkel ishin të bashkuar në bindjen e tyre se Rusia nuk duhet të përdorë energjinë si një armë gjeopolitike.
“Miqtë e mirë mund të mos bien dakord në disa gjëra. Ne qëndrojmë së bashku dhe do të vazhdojmë të qëndrojmë së bashku për të mbrojtur aleatët tanë të krahut lindor në NATO kundër agresionit rus”, tha ai në lidhje me tubacionin gjatë një konference të përbashkët shtypi.
Merkel vuri në dukje ndryshimet në mendime, por theksoi pikat e unitetit midis dy vendeve. “Ne të gjithë ndajmë të njëjtat vlera; të gjithë kemi të njëjtën vendosmëri për të trajtuar sfidat e kohërave tona”, tha ajo.
Biden u zotua të ketë një vendim së shpejti nëse do të heqë një ndalim të lidhur me pandeminë për evropianët që udhëtojnë në Shtetet e Bashkuara që ka dëmtuar Gjermaninë dhe aleatët e tjerë.
