Në seancën e sotme parlamentare, ashtu siç ishte paralajmëruar, u betuan deputetët e rinj të opozitës.
Por kjo nuk është pritur mirë nga Partia Demokratike, të rinjtë e së cilës u mblodhën para parlamentit të revoltuar.
Ata kanë hedhur kapsolla dhe gurë në oborrin e parlamentit, ndërsa para nisjes së seancës kishin ngjitur në ambjentin përreth pankarta ironizuese për deputetët e rinj.
Ndërkohë kujtojmë se hyrjet e Parlamentit janë rrethuar me skela, ndërsa ka prezencë të efektivëve të policisë për çdo rast të mundshëm.
Deputetët që u betuan sot ishin: Elda Hoti nga radhët e LSI-së e cila zë në Kuvend vendin e Viktor Tushajt, , Erdiola Braha e cila merr vendin e lënë nga Vangjel Tavo nga LSI pas djegies së mandatit, gjithashtu nga radhët e LSI-së është betuar sot Edlira Hyseni e cila ka zëvendësuar në seancë Nora Malajn.
Ndërsa nga Partia Demokratike janë Lefter Maliqi në vend të Astrit Veliajt, Majlinda Halilaj e cila merr vendin e lënë nga Gent Strazimiri si edhe Ligoraq Karamelo i cili plotëson vakancën e krijuar nga djegie e mandatit nga ish-deputeti Klevis Balliu.
Me betimet sot, numri i deputetëve të rinj të opozitës në Kuvend shkon në 11. Në seancën e kaluar bënë betimin Ylli Shehu, Aurora Mara, Edmond Rrushi dhe Enver Roshi, të cilët vijnë nga listat e LSI-së.
