Mjekët që gjenden në vijën e parë të luftës, kanë përgjegjësi të dyfishtë sepse përveç kujdesit për pacientët, duhet të jenë vigjilentë edhe mbi shëndetin e tyre.
Fatkeqësisht, në gjithë botën mijëra mjekë e infermierë kanë humbur jetën nga Covid-19, ndërsa vendi ynë sipas Manastirliut është larg këtyre skenareve dhe se deri tani janë infektuar 52 persona të personelit shëndetësor, nga të cilët 36 janë shëruar.
Mes të infektuarve ishte edhe mjeku i Urgjencës Kombëtare, Skënder Brataj, që ia doli të mposhtë virusin e rrezikshëm dhe tashmë gëzon shëndet të plotë.
Në një lidhje me Skype për ‘Opinion’, numri një i Urgjencës tregoi disa detaje të reja rreth betejës së tij me koronavirusin , duke treguar se fillimisht virusi i kishte prekur mushkëritë.
Mirëpo, kolegët e tij nuk ia kishin treguar rezultatin e skanerit të parë pikërisht prej problemeve që ai kishte shfaqur, por më pas, Brataj tha se në skanerin e fundit kishin mbetur shumë pak shenja nga virusi, gjë që sipas tij ishte normale.
“Nga data 21 mars deri sot. Problemi me koronavirusin është që kur kalon ditët e para. Ndjeja lodhjen dhe problemet. 4-5 ditët e para kisha temperaturë, diarre. E dija çfarë më priste. Bëra një skaner ditën e 5-të. Por ma bënë me hile dhe nuk ma treguan. Në skanerin e parë kisha probleme pulmonare. Tek i fundit ishin reduktuar fare. Tashmë janë shumë mirë. Por, duhet shumë aktivitet fizik. Unë kam bërë 10 kilometra ecje çdo ditë brenda shtëpisë.”-tha mjeku.
Ditën e sotme ka shkuar në 494 numri i të prekurve nga Covid-19 në vendin tonë, pasi në 24 orët e fundit janë shënuar 19 raste të reja, teksa numri i viktimave ka shkuar në 25.
Tirana dhe Shkodra janë dy vendet më të prekura, përkatësisht me 237 dhe 77 të infektuar.
