Pas një muaji sakrificash e solidariteti, besimtarët myslimanë kremtojnë sot Fitër Bajramin.
Në ndryshim nga vitet e kaluara, këtë vit për shkak të pandemisë nuk janë mbledhur në bulevardi “Dëshmorët e Kombit”, por xhami, të cilat u hapën vetëm disa ditë më parë.
Në kryeqytet falja e Namazit u bë te xhamia e Kokonozi, te Pazari i ri, ku faljen e drejtoi drejtoi kreu i Komunitetit Myslyman, Bujar Spahiu.
Mesazhi i kreut të Komitetit Mysliman, Bujar Spahiu ka shkuar për të gjithë besimtarët, të cilët në këtë muaj të sakrificës ia kanë dalë të agjërojnë 30 ditë, edhe pse vendi ishte në një pandemi botërore.
Ai falenderoi bluzat e bardha, që i konsideroi heronjtë e këtyre ditëve dhe një lutje ia drejtoi Zotit që normaliteti të rikthet sa më shpejt.
“Megjithëse ky Ramazan u përjetua ndryshe, sidomos në aspektin sociale jemi të gëzuar që arritëm ta mbyllim agjërimin me sukses. Ky Bajram vjen me një situatë të përmirësuar, falenderojmë mjekët që punuan me përkushtim. Besimtarët mysliman shijojnë një jetë të disiplinuar gjatë këtij muaji, si në rrafshin mysliman edhe atë shpirtëror. Vetë urimi Gëzuar Bajramin është urimi më i mirë, që buron nga thellësia e shpirtit. Koha që të reflektojmë fortë për vlerat e familjes dhe ta ruajmë atë nga antivlerat. I lutem zotit të na fali dhe mëshirojë, të na ruaj nga fatkeqësitë, sëmundjet dhe pandemitë që na kanë kapluar gjithë globit. Allahu të na ruaj nga çdo sëmubje që është e rëndë dha nga çdo gjë që nuk e mbajmë dot në supet tona.
Në Berat, këtë vit falja u krye në dy xhami: në Xhaminë e Plumbit dhe në Xhaminë e Sahatit.
Përzgjedhja e këtyre dy xhamive, njëra në hyrje të qytetit dhe tjetra në qendër u krye me qëllim shpërndarjen e besimtarëve sipas lagjeve dhe mos grumbullimin e tyre gjatë faljes.
Xhamia “Pasha” në qendër të Elbasanit ka shtruar tapetë jashtë perimetrit të saj për të bërë të mundur distancimin social, edhe pse kjo ishte pak e pamundur.
E njëjta situatë ka ndodhur dhe në Kavajë, ku qindra besimtarë myslimanë falën sot Namazin në xhaminë e madhe të qendrës dhe xhamitë e tjera të qytetit.
Së bashku me urimin për festën, besimtarët u lutën sot në këtë ditë të shënuar për me shumë shëndet, paqe, dashuri dhe lumturi për ta dhe familjet e tyre.
Çfarë është Fiter Bajrami?
Kjo është një festë shumë e rëndësishme për besimtarët mysliman, pasi zhvillohet pas mbarimit të muajit të Ramazanit.
Emri Fiter Bajram vjen nga fakti se myslimanët para ditës së Bajramit shpërndajnë lëmoshë, solidarizohen me të varfrit, dhe kështu në këtë mënyrë festojnë së bashku këtë festë.
Zoti ligjësoi në fund të muajit të Ramazanit festën e Fitër Bajramit, gëzim për myslimanët ashtu siç ligjësoi festën e Kurban Bajramit në ditën e dhjetë të muajit Dhul-Hixhxhe.
Festa e Bajramit manifestohet duke falur namazin e Bajramit.
