Shqipëria vijon të humbasë një pjesë të konsiderueshme të popullsisë së arsimuar, duke shënuar nivel të lartë emigracioni gjatë viteve 2023 dhe 2024, ndërsa rikthimet mbeten ndër më të ulëtat në Rajonin e BERZH. Të dhënat janë publikuar në raportin e fundit të tranzicionit të Bankës Europiane për Rindërtim dhe Zhvillim.
Sipas përllogaritjeve të BERZH, rreth 23 për qind e qytetarëve të arsimuar nga Shqipëria kanë emigruar tashmë. Ky tregues e vendos vendin tonë mes rasteve me deficit më të theksuar mes largimit dhe kthimit të trurit.
Bosnja dhe Autoriteti Palestinez renditen më keq se Shqipëria, ndërsa Taxhikistani paraqet një situatë të ngjashme me vendin tonë. Në grafik pasqyrohet se shumica e vendeve të tjera në tranzicion regjistrojnë përqindje dukshëm më të ulëta të emigrimit të të arsimuarve dhe ritme më të larta rikthimi.
Raporti nënvizon se ky fenomen po ndikon drejtpërdrejt në zhvillimin ekonomik, konkurrueshmërinë dhe aftësinë e tregut të punës për të përballuar nevojat e një ekonomie që synon rritje të qëndrueshme.
