Mbrëmjen e sotme kryedemokrati Sali Berisha thotë se ish-agjenti i FBI-së Charles McGonigal ka drekuar e ka takuar anëtarët e Prokurorisë së Posaçme Kundër Korrupsionit dhe Krimit të Organizuar (SPAK) dhe i ka udhëzuar ata të arrestojnë kreun e PD-së.
I ftuar në “Çim Peka Live”, Berisha tha se SPAK është kthyer në një repart partie, pasi McGonigal ka komanduar dhe procesin e Vettingut dhe ka vendosur se cili gjyqtar apo prokuror e kalon këtë proces. Kreu i PD-së tha gjithashtu se ish-drejtori i Policisë së Shtetit dhe aktualisht në krye që Agjencisë së Mbikqyrjes Policore, Ardi Veliu ka pasur shumë miqësi me McGonigal.
Pjesë nga fjala e Berishës:
Kush ta hetojë more? Kush? Ai që drekonte me anëtarët e SKAP-it dhe u thoshte ‘arrestoni Berishën, ju tregon unë si ta arrestoni Berishën’. Ka takuar jo një, por disa kryesore prej tyre. Sali Berisha e ka thënë 100 herë që është i hapur për hetim. Çfarë mund të hetojnë ata? Ata janë repart partie, jo një takime dhe jo një person, por disa prej tyre. Di që është marrë dhe me vetorë, di që ka kërkuar kush të kalojë e kush të mos kalojë. Ai ka bërë me pagesa, a i ka bërë me urdhër të Ramës, këtë nuk e di. Ky është një skandal më vete. Këto gjëra kanë ndodhur. McGonigal ka qenë njësh me Ardi Veliun. Veliu e kishte si bodyguard.
