Ish-kryeministri Sali Berisha ka konfirmuar kandidaturën e tij për kreun e PD, nga Kavaja ku mbajti sot foltoren e radhës. Berisha i bëri ftesë demoratëve që të firmosin formularët e shpërndarë dhe në këtë mënyrë të rikthehet referendumi e të hapet një garë, pjesë e së cilës do të jetë edhe ai.
Ish-kreu i PD u shpreh se besimi i demokratëve është frymëzim për të dhe vuri në dukje se takimet e tij me anëtarësinë rinisën në rrethana krejt të pazakonta. Megjithatë, Berisha u shpreh se kishte besuar se demokratët janë atdhetarë dhe njerëz të idealeve.
“Ftoj çdo delegat që të firmosë të rikthejmë referendumin. Të firmosë natyrisht që të hapim një garë, në të cilën, garantoj se çdo njeri që do hyjë në atë garë do të ketë një garë të lirë. Natyrisht njëri prej tyre do të jetë dhe Sali Berisha. Besimi im te ju është frymëzim për mua. Kam shumë besim te demokratët. Kisha 8 vite i larguar dhe ju e dini që këto janë takimet e para publike me anëtarësinë. U nis në rrethana krejt të pazakonta. Por unë prapë se prapë besoja se demokratët janë atdhetarë. Besoja se janë njerëz të idealeve”, ka thënë ish-kryeministri Berisha.
