Ish kryeministri Sali Berisha, nga dritarja e shtëpisë ka deklaruar se Durim Bami, i cili ishte temë diskutimi mbrëmë në shumë nga studiot televizive, është një personazh misterioz dhe i lidhur me Tom Doshin. Sipas Berishës, Bami nuk është vetëm një njeri i Doshit, por edhe një “ushtar” i kryeministrit Edi Rama. Ai theksoi se Rama e mori Bamin me avion për në Vjenë te McGonigal për të provuar se Bami ishte urdhëruar të kryente një atentat. Berisha përmendi këto pretendime si të dhëna tronditëse që sipas tij, tregojnë se personat në pushtet janë të përfshirë në krim.
Pjesë nga fjala e Berishës:
Të dashur qytetarë dhe qytetare. Të nderuar gazetarë dhe gazetare. Mbrëmë në studiot televizive ishte një personazh i kudogjendshëm, Durim Bami. Ju kujtohet intervista e famshme e Tom Doshit ndaj Durim Bamit. Shumë nga ju mund ta mendojnë Bamin si njeriun e Doshit dhe nuk është se ai nuk është i lidhur me Doshin.
Por Bami, për çdo njeri që i thotë të vërtetës, të vërtetë, është një ushtar i Edi Ramës. A nuk është Edi Rama që e mori me avion Durim Bamin dhe e çoi në Vjenë te McGonigal për të faktuar se ishte porositur të bënte atentat? Gazetarë dhe gazetare, këto të vërteta janë të vërtetat më tronditëse. Këto të vërteta tregojnë se kriminelët e mëdhenj, se bajlozët e krimit janë sot në pushtet. Janë ministra, zëvendëskryeministra dhe kryeministri vetë.
