Kreu i Partisë Demokratike, Sali Berisha, u paraqit sot në ambientet e SPAK në kuadër të masës së sigurisë “detyrim paraqitje”.
Pas daljes, ai dha një deklaratë për mediat ku foli për qëndrimin e tij përballë drejtësisë dhe zbuloi mesazhin që, sipas tij, ia ka lënë drejtuesit të Prokurorisë së Posaçme, Altin Dumani.
“Kjo zyrë shteti që paguhet me rrogat më të larta në Ballkan, paguhet me 7 mijë euro personin, do të shpallet seksion i kartelit Troplini, më të fuqishëm të drogës në Europë, i vetmi që administron Portin e Durrësit. Ndaj dhe në shënimin që i lash Altin Troplinit, e informova se sot e tutje nga Dumani do ta quajmë Altin Troplini. Kjo për arsye të forta ligjore sepse ky bashkëpunëtor i kartelit më të fuqishëm të Europës, mbajti në zyrën e tij 22 ditë vendimin e gjykatës për arrestin e Xhevdet Troplinit, Elvis Doçit apo Pojave”, tha ai.
