Ditën e sotme, ish-kryeministri Sali Berisha bëri të ditur se dje mbylli turin elektoral në bashkitë e jugut, duke e cilësuar atë si një tur të suksesshëm. Në fjalën e tij Berisha tregoi se çfarë ka evidentuar gjatë kësaj kohë që ka zhvilluar fushatën në jug të vendit. Ai u shpreh se ekziston një kontrast i madh midis kandidatëve të primareve, të votës së lirë dhe dinjitetit, dhe kandidatëve të mafies, të bodrumeve të Edi Ramës, ku tha se janë të përfshirë në ferat e tyre të zeza. Ndër të tjera, kryedemokrati ngriti akuza të forta ndaj kadidatit të Ps Durrës, Igli Cara, ku tha se është vërsulur të pushtojë Sarandën, me të deleguarin Alket Hyseni, i cili ka marrë përsipër të zhvarrosë të vdekurit në Sarandë për të ndërtuar pallate për qeveritarët.
“Mbrëmë mbylla turin në të gjitha bashkitë e jugut dhe mund t’u them se ai ishte turi më i suksesshëm që unë kam pasur ndonjëherë në jugun e vendit. Qytetarët në Tepelenë, Memaliaj, Këlcyrë, Përmet, Sarandë, Konispol, Delvinë, Libohovë, Derviçan, Dropull, me një padurim, me një kthjelltësi dhe vendosmëri, po presin 14 majin për të firmosur ndryshimin. Për të firmosur shpëtimin e bashkive të tyre dhe të Shqipërisë nga kthetrat e zeza të mafies qeveritare. Kudo që shkova, gjeta qytetarë të revoltuar, gjeta qytetarë të cilët nuk përmbanin ndjenjat gjer në urrejtje ndaj qeverisë dhe shtetit të mafies. Një kontrast i madh ekzistonte dhe kishte elektrizuar klimën elektorale, kontrasti midis kandidatëve të primareve, të votës së lirë dhe dinjitetit, dhe kandidatëve të mafies, të bodrumeve të Edi Ramës, për të cilët në mënyrë absolute, asnjë socialist i vetëm, asnjë qytetar i paparti, nuk ishte pyetur. Skandalet e kandidatëve të emëruar nga Edi Rama, aferat e tyre të zeza, nxinin në Tepelenë, Memaliaj, Përmet, Sarandë, Delvinë, Konispol, Derviçan, Libohovë. Misioni i tyre ishte plaçkitja e pasurive publike. Mafia e Durrësit, po humbet falë fitores së Igli Carës, është vërsulur të pushtojë Sarandën, me të deleguarin Alket Hysenin. Ky i fundit ka marrë përsipër, a mund të imagjinoni ju, të zhvarrosë të vdekurit në Sarandë për të ndërtuar pallate qeveritarët. Misioni kryesor i mafiozit Alket Hyseni është ky. Ai ka përballë Ardit Cikulin, një qytetar shembullor, serioz, të përkushtuar ndaj të cilit nuk rëndon asnjë edhe një aferë, përkundrazi përkushtimi dhe aftësia e tij kanë fituar zemrën dhe mendjen e qytetarëve të Sarandës. Përfaqësuesin e mafies së Durrësit nuk e kishin dëgjuar kurrë”, shprehet në fjalën e tij Berisha.
