Lideri i opozitës, Sali Berisha, u shpreh se do të denoncojë çdo emër të ndërkombëtarëve që korruptohet nga Edi Rama për të mbrojtur krimet e tij. Gjatë fjalimit të tij në ditën e 200-të të protestës maratonë që po zhvillohet te ‘Rruga e Shpresës’, Berisha theksoi rëndësinë e luftës kundër korrupsionit dhe padrejtësive.
“Do denoncojmë çdo akt të çdo korruptokrati ndërkombëtar që mbron krimet e Edi Ramës me pagesë,” tha Berisha para mbështetësve të tij. Ai e cilësoi këtë betejë si të vështirë, duke iu referuar diktaturës ideologjike që shqiptarët kanë përjetuar në të kaluarën, kur regjimi barbar mbështetej nga superfuqitë komuniste.
Berisha përmendi sakrificat e shqiptarëve në burgje dhe kampe përqendrimi, duke theksuar se asnjëherë nuk janë dorëzuar. Ai premtoi se opozita është e vendosur të denoncojë çdo vjedhje dhe krim të kryeministrit Edi Rama, ministrave dhe familjarëve të tij, si dhe zyrtarëve vendorë.
“Ne po mbrojmë të vërteta, të cilat janë aq sa shqiptare, aq europiane, aq amerikane, aq të çdo vendi të lirë,” tha Berisha, duke shtuar se lidhjet e krimit të qeveritarëve shqiptarë janë një rrezik për vendet e tjera dhe se zbrazja e tmerrshme e Shqipërisë nuk është në interesin e asnjë vendi mik.
Berisha përfundoi fjalimin e tij me një mesazh të fortë për mbështetësit: “Ndaj dhe ne nuk heshtim. As 200, as 400, as 2 mijë, as 6 mijë ditë, nuk do na mposhtin ne kurrë. Së bashku do vazhdojmë luftën!”
