Ish-kryeministri Sali Berisha ka bërë deklarata të forta në lidhje me projektligjin për birësimin, teksa mban foltoren e tij të radhës në Kamëz.
Berisha u shpreh se ky projektligj do i hapë rrugën trafikimit të fëmijëve, teksa përmendi studimin e “Sace the Children”, sipas të cilit fëmijët në Shqipëri janë dy herë më të kërcënuar se fëmijët në Kosovë.
“Rama ka çuar në parlament ligjin për adoptimin e fëmijëve që do t’u hapë rrugë trafikimeve. S’kam asgjë kundër adoptimeve, i mbështes dhe i nderoj, por t’i besosh fëmijën atij që është krejt i vetëm në kushtet kur je shtet narkotrafiqesh e bën vetëm për t’i kthyer në objekt trafikimi. Save the Children ka publikuar studimin e tij, kur tregon se fëmijët këtu janë 2 herë më të kërcënuar se fëmijet në Kosovë dhe nuk po flas për vende të tjera. Rama do ta miratojë ligjin de facto të trafikut të fëmijëve”, u shpreh Berisha.
Në projektligjin në fjalë parashikohet që një person i vetëm mund të birësojë fëmijë dhe personat që janë bashkëjetues, por vetëm sipas nenit 163 të Kodit të Familjes. Ky nen parashikon se “Bashkëjetesa është një bashkim fakti midis burrit dhe gruas që jetojnë në çift, e karakterizuar nga një jetë e përbashkët, që paraqet një karakter stabiliteti dhe vazhdueshmërie”. Edhe në relacionin e projektligjit sqarohet kufizimi, duke theksuar çfitet heteroseksuale.
